109 Ramhuai

H/No 109 West Kidwai Nagar, New Delhi kha ka pa service laia a quarter awmna a ni a. Khami in aṭanga lehkha zir ho kha kan imaginative vak lo nge, kan groupchat hi 109 ni deuh thawr mai a. Puipunni ah pawh 109 tihin kan in zawng mai zel a. Mizo film 109 nen kha chuan kan in kungkaih lo.

Imaginative vak lo e, tih lai chuan kan tui zawngah hi chuan kal na tak tak vek hi kan ni hlawm a. Zeldin hi kan group hobby a ni bawk a. WhatsApp hi a lo ṭha khawp a. Inhmuh khawm tak tak hi a awm ta lo chung hian Mizoram syllabus thar ang te hi chu angle hrang hrang atangin nileng ṭhak ṭhak pawhin kan lo discuss ve vek ṭhin a. Sawi chhuah tlak vak phei chu an ni ngai lem lo a. Tlak lohna chhan pawh eng dang vang ni lovin thutak khuka khuk pui tham engmah kan rel chhuak ngai lo.

Ramhuai, aliens leh sci-fi hi kan tui tlanna ber an ni a. Mahse kan tuipuia kan buaipui ang hu hi chuan encounter kan la nei ngai lo. Neih phei chu a hranpaa han chak viau chu kan awm chuang lo a.

Hetiang vang hian Hnahthial ah min post-na lehkha ka dawn khan ka rilru ah thil 3 awm zinga 1 chu Pangzawl dai shrines ho va en, kha a nia. Mahse National Highway kawng zauhna ah an lo ti chhe tawh tih min lo hrilh a, ka ngaihtuah zui ta lem lo a.

Tun hnai tê, Independence Day leh audit leh DM&R leh Polling Station rationalise leh probable L&O leh MCS exam conduct leh Revenue office function ṭan tih vel a rualin kan han ngaihtuah takah chuan ka rilruin tlanbo na a zawng deuh nge, Pangzawl dai shrines ho hi ka vei tet tet a. Pangzawl North VCP Pu Siamtea nen kan in bia a, min hruai a peih hmel a, va en ngei ka tum.

Pangzawlah hian hman deuh khan zan khat riakin kan zin a. A tukah Lunglei lam kan pan tur hi shrines ho awmna ṭhin bulah hian kan ding a. Gypsy hnungah ka chuan vang khan a hmaa ṭhu ka nau kha, “Saw lai ah sawn monument 3 an awm, thla va la lawk teh,” ka tia. A chhuk ve mai a. Kei ṭawngthei lutuk ta khan, “Hmanah ramhuai a awm ṭhin an tih vanga an sak ania,” ka ti ta hram pek a nih kha. A rang a rangin a lo lut leh a. Kan kalpui te an lo tlan leh tawh si nen Pangzawl dai shrines thlalak ka neih loh phah ta a. Mahse kar hmasa khan Thiltlang VCP Pu Rindik-an thlalak hlui min zawn sak a, ka nei leh ta hlauh. Ka lawm hle.

109-a discussion hi lak tlak a awm lo, ka tih nachhan pawh ramhuai topic ah hian example ka han pe ang a. 

1. Ramhuai miin an hmuh hian an khawsik hluah ṭhin a, eng vang nge niang? 109 chuan ramhuai temperature hi a hniam ve hrim hrim ah a ngai deuh a. Anih loh vek chuan ramhuai miin a hmuh laia a adrenaline rush kha a hmuh tawh loh hnuah a rilru leh taksa in a zo lo a ni thei.

2. Ramhuai in min hran khum laiin lo muhil ta ila, a hrang tho ang em? 109 chuan if a tree falls in the forest, does it make a sound? a ti.

3. Ramhuaiin min hran khum lai kha lo hre lo ta ila, kan khua a sik tho ang em? 109 chuan kan ngaihven theih hun an nghah ve mai a ngaih hmel, kan ti.

4. Ramhuai te hi an hranna hmun pangai pelin an hrang thei em? 109 chuan bureaucratic posting ang deuh hian kal theih chin an nei in a ring deuh a. Ramhuai hi tlansan theih chen a awm ve a ni mai thei. An hran khum berte hi an pem bo daih hian an jurisdiction pawn lamah an umzui ngai lem vak lo.

5. Ramhuai indo ah Reiek an chak loh avangin kum tin Tlawng hnenah Reiek Huai ten Human Tribute an pe ṭhin tih hi lei leh van indo nen a in zawm em, bâk a tel na kha? 109 hian kan hre thawi deuh a. Chungleng leh Hnuaileng indo zawk ani a, bâk tel na chu. Lei leh Van indo chu tlemin a Catholic rim nam deuh, Lucifera leh Michaela te lam chan. Pearly Gates-ah Petera awm vang maia Pialral sentry-ah Paula a awm ve emaw ti kan awm ve lo hlauh; Pawla leh Paula lam dan in ang miau hek, an dem vak theih hran lo. Helam chu kan sawi thui ta lo. Kan hre vak lo. 

6. Ramhuai ho tan hian chakai hi an ar ve ami? 109 chuan Tlingi leh Ngama te story ah mi nung ram leh mitthi khua thil te a inverse vak kha a hre kar a. Chakai chhit ho pawh khawsik ta vak te an awm ṭhin bawk nen. An ar a ni ber, chu kan ti ngam lo na in, water spirits ho ran bik te chu an ni ve mai thei, kan ti. Lasi hovin sazuk leh sanghal te an ran bik ang deuh hian. Chakai hi ramhuai ho ar a nih chuan ar tak tak hi chu ramhuai tan chuan T-Rex an ni mai thei bawk. 

7. Ramhuai man te hi an rimchhe kher zel. Hei hi 109 chuan ṭul kan ti vak lo. Hmanah Pasighat ah ka pa post laiin Arunachal ho ramhuai hlau lutuk in khanghu hmun hi ramhuai a awm emaw an tia, an suat chiam tawh. A va ho tak. An ṭawp ve hrim hrim vangin thlarau sual hi an rimchhia ni mai thei a. Ramhuai neutral te chu an rim a chhe hran lo aniang. Lasi te pawh rimchhe vek se tumahin an zawl duh lo ang.

8. Mizo ten faifuk hian thli a ko, kan tih hi Arunachal ho chuan thim tawh hnua faifuk chuan ramhuai a ko, an ti thung a. Pasighat ah ka pa awm lai khan tumah thim hnuah an faifuk duh ngai lo, tih a sawi ṭhin. Chinese anime Mushishi ah khan Ginko khan hei hi a va tawng ve a. Ramhuai ko thei naupang a lo awm a, a faifuk khan ramhuai a ko a, a control thei a. Midang ngaihah chuan thli control thei angin a lang. 109 chuan kan thawnthu te NE dang leh China lam te nen lo inmil leh fu ṭhin hi a fascinating kan ti.

9. Motor, esp bus, accident na velah hian hrang an sawi hnem thei sia, engatinge leimin naah hian an sawi vak loh? 109 discussion hi a sensitive deuh a, hei chu redact mai ang. In lo zeldin chhunzawm ve atan.

10. Kawnpui dai ramhuai/hrang hi an sawi nasa a, 109 chuan fiah a chakawm kan ti a. Mahse fiah tih lemah, YouTubers ten zuk fiah se, video in capture se, en a chakawm. Kan u pakhat, tunah chuan pastor ni tawh phei chuan: Mahni chauha 2W a tlan chuan Kawnpui daia "Isua hming kan lamin ramhuai an tlanchhia" tih lo in tar hian min thlamuan aiin min ti ralkhel zawk, a ti. 109 agrees.

H/No 109 WKN ngei maiah khan zan khat chu Member1 khan zanreiah online games a khel lauh lauh a. Chutih laiin Member2 in chempuiin sazu lian mangkheng, rattrap ban ang chi a tang, bengchheng lutuk kha phun bul bul chungin a lo vawhlum. Member1 khan earphone aṭangin sazu ṭê thawm leh mihring phun thawm leh vaw chawrh chawrh ri kha a hre riai ruai a, midang an mu vekin a hre sia, a hlau deuh a, a va en thlithlai mai ngam chiah lo deuh a. Member2 lah khan a chem a silfai a, a mu leh mai bawk a. Member1 in a enkual ngam meuh chuan light a in off vek, mi zawng zawng an mu leh tawh. A computer a shut down a, a khum ah “rei deuh ka ṭawngṭai ringawt,” a ti. 

Chu bak chu ramhuai experience kan nei tam vak lo. 

(Dik tak chuan a zawna zawng reng ta chuan kan ngah a, mahse ngaihbel tur story ho hi a ziktluak vak ngai lo a. Mi bula han sawi tur khawpa ngaihnawm kan la tawng lo. Tawng lo mah ila pawi kan ti vak lo.)