Tunah pawh exam leh I-day leh audit leh staff leh office 3 enkawl buai lai tak hian ka rilru ah chuan Mizo thu leh hla dangdai zia hi a ri thum dawt dawt tlat ta a ni.
School ka chhuahsan hnu hian uniform hak leh ka tum tawh lo a. Nge, school kal chhung zawng uniform ha mawi ve thei ngai hek lo i. School Schedule hi ngaihven leh ka tum tawh reng reng lo bawk. A chang chuan School ni lovin classmate te hi chu ngaih ve det chang chu a awm ve thin a. A changin zirtirtute leh zirlai te pawh ngaihtuah chhuah chang a awm ve a. ICSE High School ah “Mizo Thu Leh Hla” tih kha tunlai tak chu ka rilru ah a rawn lang a. ICSE ah chuan Mizo tih lovin Lushai tihin subject hming an dah bawk. GK nih chu ow.
Mizo thu leh hla hi an grammar a dang a, a ṭawng hrim hrim pawh hi a dang in ka hria. Mizo ṭawnga tluangtlam pangai taka sawi theih hi a un leh ulh thei ang berin sawi ila, Mizo hla chu a ni deuh ber. A awihawm leh awihawm loh pawh hi a lo pawimawh ber lo. Mizo hla ah chuan lelte kiu ril rel in lung a ti leng a, Mizo thu ah chuan thereng hram ri chuan lu a ti na. A mawi lo. A bengchheng.
A chang leh Thu leh Hla danglamna chu ṭawng letling ila, a fel der. Hla a Siar chu Thu ah chuan Arsi, chutiangin Kulva chu Vakul. A chang leh a thlum belh zeuh. Thu a Mumang chu Hla ah chuan Tawnmang, Silaimu chu Ngenmu. A chang chuan enge hla phuah tu hian a sawi tum ni ang aw tih rum rum theih khawpin thumal a dang. Ramhnuai hi Lentu tih in hre bik ami?
Thu khuh ṭhin hnam, a nihna ang taka thil sawi mai lo mi kan nihna hi kan Hla ah hian a lang lehzual ṭhin. Ṭah pawha ṭap satliah lo, luaithlipui nul thin kan ni a mom! A loh theih loh. Hnuk te lai lai a ulh. Hnuk sawi takah chuan, Thu leh Hla chu sawi loh, Hla tel miah lo pawhin hnuk ulh leh a chat kar te hi a hla lutuk reng reng a ni.
Thlado kunga chawnpui par tir hnam kan ni bawk a, Lungtat pawh kan par tir ang. A dik vek zel mai. Pial te hi enge a nih reng reng min hrilh thei in awm em? Ka nu hi Pialtu a ni a, Piallei, Pialtlep, Pialral te kan tia, a thluk a in ang chiah lo na in inzawmna te an nei em, pial ṭeuh ṭheuh?
Ṭawng lehlin te hi Mizo ṭawngah hian a har ṭalh reng a ni. Hman deuha internet a ṭhat lehzual hma, Cable TV kan la en ṭhin lai khan, movie 1 an dub ah “Ke ti tliak rawh!” an ti mauh mai a. Ka ner nghal nawk. Ka en reng lai anih vang khan a sapṭawng ah chuan “Break a leg!” an ti ang tih a hriat theih nghal a. A nih ang anga lehlin chuan a dik, a sapṭawng phrase ṭobul chhui pawhin a dik deuh ruak, mahse a context ah chuan a dik ta hlawl lo. AVBT. Vur tla a ni lo, frost a ni a, dai khal tih tur, tiha sapṭawng in ti thiam lutuk ho pawh khan khawi laiah nge dai tla in hmuh tawh ngai in sawi theih hma chu vur kha tlak tir ve tho rawh u. Context a pawimawh. Champhai ka post lai aṭanga ka hne tawh. AVBTQ.
A reng reng in, buaina hi a thuah thum thuah li chang hian mi ṭhahnemngai zawk chuan mi pali panga ni thei ila, an ti ṭhin. Kei chu pali panga a insem sawm a, buaina chinfel ai chuan Samdala School of Thought subscribe ta sa sa, buaina zawk kha tlem daih se ka ti ve tlat!
Buai nuam u!
No comments:
Post a Comment