He pa hian sawi nuam a tih leh em em dang leh chu “Only lend out money you will not miss if it never comes back to you,” tih hi a ni a. I hmuh let loh pawha pawi i tih loh chin chauh pawisa mi puk tir rawh, tih hi midang pawh ka hrilh ve ṭhin.
Thil pahnih sawi chuan pathumna awm lo hi a kim lo riau thin a. Lungthu kim nan hrim hrim enge thil dang a sawi thin bawk aw, tih ka ngaihtuah a.
Ka hriatchhuah belh chu NIFM Faridabad campus ah a chen tirh khan ka zirtirtupa hi chhangthawp lei turin a chhuak a. Chhangthawp man a daih lohna cheng 5 hi Dawr-I khan a lo bat tir phal lo a, Dawr-II khan a lo phal thung a. Kum 20 chuang NIFM ah hian ka awm ta a, Dawr-II chiah hi ka dawr ta ngat ngat a, staff leh students lo awm thar apiang hnenah Dawr-II hi an fel, tih ka hrilh ziah bawk, a ti a. “Hehe” a ti ṭhin.
A 3-na hi chu Mizo tak chuan, Ṭawngkam ṭha in sial a man, tih hi a zirtir ber chu a ni tawh mai thei a ni. Strict taka teh chuan Ṭawngkam em em ai mah chuan Chezia a ni zawk ang a. Mahse business ṭan tur tan chuan ṭawngkam ṭha hliak hliak in mi a hneh loh chinah pawh Chezia-in investment a siam theih a ni, ka tihna ber a nih chu. Dawr-II in pa pakhat cheng 5 a puk tir kha ka pu khan a let tam takin a rul tihna te pawh a ni bawk ang chu. Business investment hi chu Mimal/Personal investment nen a inang chiah lo deuh bawk a. Pawisa kan puk tir dawn a nih chuan tunge kan puk tir tih leh eng zat nge kan puk tir, tih ngaihtuah a ṭha, tih te pawh a zir theih ang. Zirtir a va ngah si tak.
Pawisa enkawl hi thiam tak tak a har khawp a. A thiam tam tam hian an duh tam zel mai bawk a. Tawk chin neih a awm lo a. Mahse ka tawnhriat ve chinah nunphung leh Nun hlohna lo chin zel hi a lo thlanawm ṭhin in ka hria. Pawisa lakluhna awlsam chu a chhuak leh hma, tih te pawh hi a lo dik khawp a. Hun pangngai lo deuh hlek han tawha kan nghin nghal vek lohna tur tawk te te khawl a tihpun erawh hi chu mahni phak tawkah chuan tum ila a ṭha. Engemaw zawng chuan a Bible thu hla riau mai bawk a. Talent kawl tam leh peipung tam hnenah chuan pek belh zel kha a ni tlat a ni.
Hmanni ah ka ṭhiannu in mi ṭhenkhat puk chawpa Inkhawmpui Kawr lei te, installment a perfume lei te, ba a Hydra Facial leh eyelash extension ti te a hriat thu min hrilh a. Mi ṭhenkhat ba ngata zu lo rui mai mai te ka hre fo bawk nen, ka pu hian a ngaisang awm lo hlawm mang e aw, tih ka ngaihtuah phah ta a.
Ba hrim hrim hi Hamlet-a drama-a Polonia-an a fapa Laertes-a thu a chah, “Neither a borrower nor a lender be,” tih ngawt kha chu Sorkar ah emaw Business ah emaw Mimal ah emaw theih loh chin a awm a. Mizo ṭawnga William Shakespeare thawnthu let tu JF Laldailova’n, “Mi hmuhsit tur khawpin lo lungngai suh la, incheina kawngah fimkhur la. I neih phak bakin inchei ngai suh la. Inpuktawnna hi ngaihsamna lantirtu ah ngai tlat ang che. Denmark ram lal upa min, i pa, Polonia hming hi tichhetu ah ṭang ngai suh ang che,” tiha a lo dah mai kha pawm a nuam viau in ka hria. A hun leh hmun milin pawisa enkawl dan te, awmdan hrim hrim pawh hi zir a lo fuh.
Chhangthawp man cheng 5-a min tlawm thei tu chu min tlawm duh miah lo tu ai chuan kan dawr nawn ve tho mai thei a ni. Ni em?
No comments:
Post a Comment