Office Bo

Hriatloh chin hi chu hriat loh theih ve deuh hi ania. Tu emawni office kal tir pawh kha an pu ten vin titihin File kha put up vat teh, an ti a. “File put up” pawh la hre si lo, an aw key atangin an hmanhmawh tawh tih hre ve bawk si, file a la lawk a, a bul hnai ber steel rack sang ber chungah vawm chho hmiah mai asin. A demawm hran lo.

Mizo tawngin a daih thin si lo, Mizo leh English hi kan hman pawlh mial mial a, a hrethiam tawh tan chuan a awlsam phian a. A hre ngai lo tan erawh chuan a mual bovin a bo theih fu ani. Office kai ho han thu khawm ula, han sawi chhin ula, sawi tur in hre ve nual tho ang.

Ka service tirh first posting a Dte. of A&T ah ka thawh tirh khan File chhunga dak docket-a page number tih aia c tih kan hman kha enge “c” awmzia ka zawt kual a. Pu LMa nen kan han ngaihtuah dun ngial a, kan hrechhuak zo lo kha ania. Mahse tunah chuan ‘correspondence’ tihna ani tih ka hre tawh a, office zawm thar apiang hnenah ka hrilh ve ziah tawh. Chutiang bawkin Notesheet margin chunga (Number)/N pawh hi Notesheet No. tihna ah ka ngai. Ka confirm ngam lo.

Kan unau zinga pakhat pawh hi office a zawm tirhin an pi in, Kan file ho hi an kalna a thui ve thin a, mahse U/S ah kan thawn mai thin a, a lo ti a. Lam rik chuan U Slash S tihin tumahin kan sawi tawh si lo a, Secretary line la hre bel lo nen, file “kal hla tur” ni bawk si kha, USA ah emaw an thawn dawn aw, tih a lo ngaihtuah fu nih hmel. Tu ber nge chu ka sawi duh chuang lo a. Kan ukil ber hi chu a ni lo a. Mahse ani pawh a thawh tirhin RO&AC tih hi eng tih na nge, tih a zawt kual a. A thawk hovin an chhang duh vak lo a, an hre bik lo ani mai thei, Google in a hre hlauh thung a.

Lamtawi hi hmun thar, subject thar apiangah a buaithlak lai ani ziah reng bawk a. Court Case a “…&Ors.” pawh hi hre ngai lo tan chuan bo theihna deuh ani, ORS rau rau ah Oral Rehydration Solution lo lar zawk khanglang bawk nen. Chutiang bawkin Mizoram chhungah chuan “puc” tih pawh PUC – Pachhunga University College lo lar phian sia, an college kaihhnawih miah lova puc tih chu bo theih deuh ani. La hre lo tan Ors. = Others; puc = paper under consideration, aw!

Tunah chuan sorkarin training hi mandatory a ti tawh a, a lawmawm hle ani. File Number te hi duh duha pek mai chu kan bo tlang dial mai dawn a lo ni a. Official Functional File Index a group head H thleng chauh awm si kha ka office pakhat ah chuan R leh K te kan lo nei a. A file hawngtute hnam hming tir a ni mai thei, ka chiang ngam chiah lo. Kha ti chuan file a regular duh lo khawp; hlimawm phian thung. Champhai DC office kan pu pakhat nen Even No. tih ah kan buai dun neuh neuh tawh bawk a, thenkhat in Odd-Even tihna ah an lo ngai a, keini in a lehkha reference ngai tho, mahse follow-up emaw corrigendum emaw turah kan ngai thung a. Kan ngaihdan hi a dik zawk tho chuan ka hria a, mahse khami lehkha tak kha chu Even No. tih rau rau ah a lehkha hmasa kan dawng si lo a, kan buai hrep tho!

Kan training lai khan Dr HTC Lalrinchhana class ah hian thuphungin Gazette publications-a “Extraordinary” tih ni ziah hi enge awmzia, tih kha min zawt a. Thil chik mi tan lo chuan lo chhiar liam puat kha a lo awl phian. Ka service tirha c awmzia ka zawn ang tho khan a lo research ve anih hmel a. Gazette hi regular taka chhuak a nih loh avangin a chhuak apiang hi “Not Ordinary” edition a ni zel a, chumi sawina atana Extraordinary tih a lo nih hmel a, extraordinary rau rau ah thil mak danglam tihna ai chuan pangai lo tihna a lo nih hmel zawk. Hetah hi chuan, a lo ni maw! in ti ve tho dawn hian ka hria.

Hriat loh ai chuan Hriat Sual pawh hi office ah hian a tam ve thei thin a. Ka service ve hma thil thleng Office of the CCA a senior staff ten an nuihpui bawk bawk thin chu officer rual buai phili tawhin peon senior pakhat kha rang taka eng thil emaw va la vat turin an lo tir a. Ani in pute buai tawh zawh nawn a hreh si kha a kal chhuak a, a hriat dan ang khan, Bakcheh Lian an lam e, a ti a. Bakcheh Lian nen chuan a va lut a. Mahse kha lam ni lovin Budget File Lian kha an lo duh kha a lo nih hmel a, in man loh theih fu chu ani. An bo dun ve ve ang ka ring.

Anni chauh pawh an ni bik chuang lo a. Secretariat ah austerity measures kalpui tak tak lai pawhin draft pakhat ah Obscurity Measures tihin dealing in a lo draft a, thui fe a kal chho ve mai a. Kan IAS pakhat in engmah sawi lovin a lo correct ve mai a. Nuihzat emaw thinrim emaw ah la lova a lo siam tha mai kha a fakawm angreng phian.

Office chanchinte hi chhungte pawh hian an in hriatsak lo emaw an in hriat thawi sak fo bawk a. Treasury Officer ka nih lai khan police nupui pakhat, Tun thla chu arrear in cut sak dawn tih ka lo hria a, a cut loh theih mai em? tih min zawt a awm nawlh bawk a. A sign tu pawhin second tam lo chu, maw? kan ti ha mai ani. A pung lak belh tur tihna ania, a lak then lampang pawh ani lo, tih kha ka lo hrilhfiah ve mai a. A lungawi ta vak lo a. Tu pa emaw Khawmawi budget tur ka sawi bo sak a ni mai thei; pawi taps.

Poker leh Screwdriver hriat pawlhte, “pheikhawk hrui ang deuh, tawi te te” lo ngah viau te, office hnatlan nikhuaa tulthir leh thirkhen lo hre hrang lo ang te, sawi tur a tam duh zek. Office lo ah pawh ruahpui vanawn aia vanpui ruah awn lo sur tir tum tlat te hi chu awm ve theih hrim hrim ania. Tih loh ah chuan office kalphung hriatthiam loh hi chu zah leh tlawm ah a lak reng theih loh anih ber hi! A mual bovin ka bo, tihte, sipai bang ka bo tihte hi office titi atanga ka hriat ania, a awm ka ti ta hle. A office bo-a kan bo loh chhung chu a tha vek e, ti mai ang!