Ka pi Santhiami leh ka pi Hauvi te kha an inkawm ngeih reuh khawp a. Lunglei Luangmual 2nd Bn MAP hmunah an rawn zin dun a. Thlasik zing kar nilum ai pahin Uipum tlang dung an en dun a, kan in unau ang ka ring, an han ti dun ṭhin a. Ka pa nu leh ka nu ni te an ni a, kan inah khan an rawn cham dun ṭhin a. Naupang ho an rawn awm ṭhin nge, ka hre chiah lo.
Gypsy-ah kan inhnawh khawma kan zin kual ṭhin lai chuan min zai pui ṭhin a. Ka pi Hauvi hian a khat tawkin “Pitar putar naupangte... kha sa leh ang u,” a ti a, hla a thlang a. Midang chuan U-A-Ma an tih hla kha. Hemi line hi naupang ho kan awm ṭeuh ṭhin vang kha a ni mai thei, a duh thei viau a. Ring deuh deuhin kan sa ṭhin. A hnu deuh lawkah keimah emaw Samuela emaw kan rui a, kan luak leh nge nge bawk a. Motor ruih hi zin hrehawmna ber a ni mai thei. Tarmit ka bun tak hnu khan ka rui chhunzawm ta miah lo bawk a, a va han lawmawm tak. Mi motor rui ka hmuh hian ka ngai lo.
I digress. What was I saying?
Ringtu Zawng Zawng Te U, tih ah kan awm tak e. Christmas lai ani mai thei thin an rawn zin/kan va lam ṭhin lai kha, kan sa nasa thei em mai.
Tun kum ang reng renga ka rilru a Christmas loh hi ka la hre ngai lo. Kum dangah chuan Christmas hi nuam ka tia, ka phur thei phian a. Tun kum chu Santa Claus aiin The Grinch ka hnaih zawk tlat. 22nd December ah pawh ka Christmas Spirit thei bar lo chu a ni.
Chuti chung chuan zinkawngah tal Christmas Carols ka la play ve ṭang ṭang a. Christmas hla hi an mak khawp a. Kum tluanin kan sa lo vang vang a. A hun a lo thlen hi chuan lyrics en ngai lova sak pui theih hi an lo ni ve leh zel. Kan memory hi a lo ṭha awm ngawt mai. Kan hria tih pawh kan hriat tawh loh te pawh hi ISIS Sleeper Cell ang deuh hian a hun taka kaihthawha activate theih nghal hi a dang pawh kan thluak hian a neih ka ring. Mi hming te hi ni ṭhin se a tha tur hi a nia. An hmel ka hriat si, an hming ka hriat tak miah loh te nena in mawl biak tawp chang a tam. A zia lo hret ṭhin.
Mahse 2018 Inthlanpui buai rum rum laia kan senior pakhat sawi ṭhin ang deuh a nia. “Esi, ti hian hun hi a kal ang a, a zo ve leh mai ang,” a ti ban charh charh zel a. A dik phian. Lalsangzuali Sailo te hla ang kha ania, kumhlui mual liam tur auh din theih ni hek lo, a kal ve zel a. Hun hi a liam ve mai zel a. Hunin hun hrehawm te a tihdam phei chu ka hre lo a, a liam thuah hi chuan a liampui ve zel a. A liam ve leh mai ang, tih mai hi a lo ṭha ta mai.
This too shall pass. C’est la vie!
Eng hun mah hi a lo rei tak tak lo. Hriat loh karah kan lo puitling a. Kan upa ve zel a, kan nu leh pa te pawh tar lam te an lo pan a. Mavena ringawt pawh thla sarih ka kawl hnu chuan kut khingkhat in ka chelh zo ta reng reng lo. Einstein-a theory of relativity fiamthua an sawi ang deuh ani, a tawngtu a zir hian hun hi a lo reiin a lo rei lo mai hi a lo nia.
Kan nghah hun te a lo thleng a. Ni thei lo anga kan ngaih te a lo thleng bawk a. Ni thei tura ngaihruat nachang kan hriat loh te pawh a lo thleng a. Ecclesiastical takin kan hun hman dan kan ngaihdana kan fimkhur hi a lo pawimawh ber zel chu a nih hi. Midang vei hman pawh hi a lo ni tak tak lo.
Feliz navidad!
No comments:
Post a Comment